Vieiros

As autoridades de Alemaña vetaron a emisión dentro das súas fronteiras á canle de TV curda con base en Dinamarca, Roj TV (TV O día), segundo confirmou este martes un voceiro gobernamental. A razón esgrimida polo Ministerio do Interior é que esta apoia a loita do pobo curdo contra Turquía.

Segundo o goberno, Roj TV é un "voceiro" do Partido Curdo dos Traballadores (PKK), grupo guerrilleiro cualificado de grupo terrorista pola lexislación xermana, "que defende a violencia como medio para impor ás súas aspiracións autonomistas".

Ademais, a mesma fonte ministerial comentou que a emisora fai propaganda para recrutar guerrilleiros que se sumen ao conflito armado entre o PKK e o Estado turco.

A prohibición leva consigo a inmediata disolución da empresa alemá VIKO Fernseh Produktion GmbH, con sede en Wuppertal, ao oeste de Alemaña, que produce programas para Roj TV, e a incautación de todos os seus bens.

Críticas d'Os Verdes
A decisión foi criticada pola portavoz de Interior do opositor partido Die Linke (A Esquerda) e ex d'Os Verdes, Ulla Jelpke, que acusou o goberno de "verter aceite no lume" do conflito turco-curdo.

Roj TV, afirmou, conta cunha programación cultural e informativa en turco, curdo, árabe e persa que chega a diario a millóns de persoas en Oriente Próximo e en Europa.